Slektshistorie - Våre familier

Gnr. 108 Nerland Brn. 6 Jakobgarden

Jakob rasmusson Lien f. 1792 i Lien i Innfjorden gifta seg med Synnøve Hansdtr. Hatle f. 1792 frå Eidsbygda. Jakob var son av Kari Jakobsdtr. Bø og Rasmus Søenson Lien f. Sæth. Synnøve Hansdtr. var dotter til Kari Knutsdtr. og Hans Hansson Hatle på Midt-Hatle i Eidsbygda. Nokre av dei næraste slektningane til Synnøve slo seg etter kvart ned her i bygda, så kanskje dette var grunnen til at dei kjøpte seg gard og slo seg til her. Ho var syster til Anne Hansdtr. Hatle f. 1806 gift i Aslakgarden på Berset månaden etter Synnøve og Jakob kjøpte garden her, og Brit Hansdtr. Hatle f. 1798 gift og busett i Erikgarden på Berset frå 1823. Dessutan kom systerson deira Anders Børreson Eide og gifta seg i Tjellagarden.

Namnet til Jakob, den første brukaren som slo rot med etterslekt her, vart brukt på dette bruket. Jakob Rasmusson fekk skøyte på 1 pd. 9 mrk. frå Lars Jonson Nerland den 23/6 1826 for 240 spd. Ein del av kjøpesummen vart betalt kontant, resten betalte han til Lars Jonson med ein obligasjon den 19/7 1830. I Synnøve og Jakob si brukartid budde dei midt i det gamle tunet framfor husa i Aslakgarden. Jakob Rasmusson var med på forlik og saker som gjekk føre seg i grenda i hans tid, og han flytta seterhusa. Jakob Rasmusson gav skøyte til son sin i 1863, og Synnøve og han vart føderådsfolk. Etter dei var blitt kårfolk budde Aslak Madsson Meland, husmann frå Svevet, hos dei som legdslem. Synnøve og Jakob fekk begge mange leveår.